Lock & Lock Goldsun Zen 煲

再黎工欲善其事，必先利其器系列
本來我係用不鏽鋼煲既，但用耐咗，個底又黃又易黐底；
之後就用大鼠既生鐵鑊，但我覺得我個雜嘜電磁爐(雙頭1500+1600)唔夠力去熱咁大隻生鐵鑊，炒菜炒到水汪汪，唔夠熱又易黐底，最最慘情係唔用得洗潔精洗(╯з╰)煎炒完成隻鑊油淋淋，只可以用熱水同用力去洗，點洗都唔乾淨(抓狂抓狂!!)好多時諗起要洗已經唔想煮
然後我就周圍睇下有咩煲煲鑊鑊啱用，大鼠話我太論盡+粗魯，禁止我買有易潔塗層既廚具，費事我洗花刮花食死人，好興既玫瑰鍋電磁爐又唔用得......
搵咗好耐，終於聽同事講lock&lock有隻好神奇既萬用煲，無塗層又唔係不鏽鋼，好似唔係地球上既物料咁（？）咁神奇就去各大百貨公司睇示範啦，果然係勁!!

最終買咗粉紅18cm，藍色24cm同綠色30cm~ 睇見咁colourful就開心~~

日式叉燒拉麵

食譜黎自好崇拜既鬼嫁《蒸煮炆燉鬼煮意》

第一次用可樂黎煮野，第一次扎豬腩肉，都算似模似樣啦~

今次失敗在時間上，趕住食，熱辣辣撈舊肉上黎即刻切，好難切呀!!切到變咗煮叉燒扒╮(╯_╰)╭

同埋煮唔夠時間，熟唔哂，切開粉粉地色，豬肉又搏唔過，唯有放返入煲，變咗黑扒...

發現Aeon買幾百蚊個鑄鐵煲都幾鎖水，煲咗半個鐘都無少到水，有驚喜~~

再接再厲!!今次早一晚整定雪凍定好形就易切好多啦~薄片放上拉麵面返熱~正呀~!
同場仲有蟹柳青瓜沙律&煎餃子~
簡單煮就開得餐啦!!( ´▽` )ﾉ

原個蕃茄飯

早排facebook被蕃茄同電飯煲狂洗板，今次到我啦!!

奶油泡芙

泡芙出爐!!大成功!!!
經過上次徹底失敗後，今次成功真係好感動T.T
整過咁多野，泡芙呢樣咁簡單既點心係要最認真最花心機去整既，材料只係牛油，蛋同麵粉，但只要一步錯，就會成盤焗唔起架啦。
由材料既份量，煮牛油既溫度，蛋既份量，麵糊既質感，每樣都唔可以錯，再到一氣吱出一個球，入爐前準備，漸降溫度咁去焗，都唔可以心急，唔係就會功虧一簣(溫度急降會凹陷....)
最後煮埋奶油糊餡，朱古力裝飾，完成~!!

木糠布甸蛋糕

老友蚊生日，整咗個木糠布甸蛋糕，俾個驚喜佢~

一切從這裡開始

本來我只係會隨隨便便煮個麵就算既人，自從同事G用個超簡單曲奇食譜"引誘"我入廚，竟然越黎越有興趣!!一發不可收拾呀~

工欲善其事，必先敗其器，未學整先學敗\(^o^)/

荃灣南豐中心789樓上下走，因為未知自己之後仲會唔會繼續整，先買最最最基本既用具先啦~