久違了的3餸1湯~

好耐無煲湯煮飯啦~
本來只係諗住整牛仔骨同炒個菜，難得大鼠開聲話想食蝦，點都要買返黎啦~

早排一田大減價，買咗d湯包返黎，今次煲"猴頭菇花膠湯"，湯包入面有猴頭菇，花膠仔，杞子，蜜棗，圓肉，不過湯包料既質素麻麻，浸完又有好多dirty野，所以記得一定要浸要洗；

一袋5包，2包花膠湯，3包响螺片湯，唔記得影

我煲6L水，落咗兩包料，另加一隻去皮雞，3隻L螺頭，3支粟米，蟲草花，南北杏，煲咗成個下晝，d味都ok啦，湯包始終唔及自己買既料；
d猴頭菇諗住聽日切粒炒肉碎~

決定咗煮咩，但一邊爐頭煲緊湯，淨返一邊，點煮3個餸呢？

好在有大鼠決定次序♡先煎牛仔骨，跟住炒菜既同時用電水煲煲定滾水，一起個菜就倒水落去灼蝦！yeah!!開工！

韓式醃汁牛仔骨，照舊加一個洋蔥半支汁，醃半個鐘，先炒洋蔥再煎牛仔骨

蒜蓉炒白菜苗，用拍蒜蓉機，成個蒜頭，幾下就拍好，快靚正!!

白灼海蝦，$120/斤，游水既仲又大隻又彈牙~水滾落少少油少少鹽，落蝦灼熟，搞掂~